ಚಳಿಗಾಲದ ಅಧಿವೇಶನಕ್ಕೆ ಸುವರ್ಣಸೌಧದ ಸುತ್ತ ಭದ್ರತಾ ವಲಯ ಗಟ್ಟಿ

ಕರ್ನಾಟಕ ರಾಜಕೀಯದ ಅರಮನೆ ಎಂದೇ ಕರೆಯಲ್ಪಡುವ ಬೆಳಗಾವಿಯ ಸುವರ್ಣಸೌಧ ಮತ್ತೊಮ್ಮೆ ರಾಜ್ಯ ರಾಜಕೀಯದ ಪ್ರಮುಖ ಚಟುವಟಿಕೆಗಳಿಗೆ ಸಾಕ್ಷಿಯಾಗಲು ಸಜ್ಜಾಗಿದೆ.

ಡಿಸೆಂಬರ್‌ 8ರಿಂದ ಆರಂಭವಾಗಲಿರುವ ಚಳಿಗಾಲದ ಅಧಿವೇಶನದಲ್ಲಿ ಸರ್ಕಾರ ಎದುರಿಸಬೇಕಾದ ಪ್ರಶ್ನೆಗಳು ಗಂಭೀರವಾಗಿವೆ ಅಭಿವೃದ್ಧಿ ಕಾಮಗಾರಿಗಳ ನಿರ್ವಹಣೆ, ಉತ್ತರ ಕರ್ನಾಟಕದ ಬೇಡಿಕೆಗಳು, ಗಡಿ ವಿವಾದ, ರಾಜ್ಯದ ಹಣಕಾಸು ಪರಿಸ್ಥಿತಿ, ಹಾಗೂ ಜನಮುಖಿ ಯೋಜನೆಗಳ ಅನುಷ್ಟಾನ. ಇಂತಹ ಮಹತ್ವದ ಅಧಿವೇಶನದ ಸಮಯದಲ್ಲಿ ಯಾವುದೇ ರೀತಿಯ ಅಹಿತಕರ ಘಟನೆಗಳು ನಡೆಯದಂತೆ ಸರ್ಕಾರ ಮುನ್ನೆಚ್ಚರಿಕೆ ಕ್ರಮಗಳನ್ನು ತೆಗೆದುಕೊಂಡಿದೆ.

ಸುವರ್ಣಸೌಧ ಸುತ್ತ ಹೈಅಲರ್ಟ್ — 6,000 ಪೊಲೀಸ್ ಪಡೆ ನಿಯೋಜನೆ:

ಕೆಲವು ದಿನಗಳ ಹಿಂದೆ ದೆಹಲಿ ಕೆಂಪುಕೋಟೆಯ ಬಳಿಯಲ್ಲಿ ನಡೆದ ಕಾರು ಸ್ಫೋಟ ಪ್ರಕರಣದ ಹಿನ್ನೆಲೆಯಲ್ಲಿ ಜಾಗೃತರಾಗಿರುವ ಸುರಕ್ಷತಾ ಸಂಸ್ಥೆಗಳು ಬೆಳಗಾವಿಯಲ್ಲಿ ಹೆಚ್ಚಿನ ನಿಗಾವಹಿಸಲು ಸೂಚನೆ ನೀಡಿವೆ. ಇದರ ಫಲವಾಗಿ, ಸುವರ್ಣಸೌಧ ಸುತ್ತಮುತ್ತ ಮತ್ತು ಬೆಳಗಾವಿ ಮಹಾನಗರದಲ್ಲಿ ಹೈಅಲರ್ಟ್ ಘೋಷಿಸಲಾಗಿದೆ.

ನಗರ ಪೊಲೀಸ್ ಆಯುಕ್ತ ಭೂಷಣ್ ಬೊರಸೆ ಅವರ ನೇತೃತ್ವದಲ್ಲಿ ಭದ್ರತೆಯನ್ನು ಬಿಗಿಗೊಳಿಸಲಾಗಿದ್ದು:

• 6,000 ಪೊಲೀಸರ ಹೆಚ್ಚುವರಿ ನಿಯೋಜನೆ
• 6 ಎಸ್‌ಪಿ ಹುದ್ದೆಯ ಅಧಿಕಾರಿಗಳು
• 146 ಹಿರಿಯ ಪೊಲೀಸ್ ಅಧಿಕಾರಿಗಳು
• 3,820 ಪೊಲೀಸ್ ಸಿಬ್ಬಂದಿ
• 500 ಹೋಂ ಗಾರ್ಡ್‌ಗಳು
• 8 ಕ್ಷಿಪ್ರ ಕಾರ್ಯಪಡೆ ತಂಡಗಳು
• 10 ಡಿಎಆರ್ ತುಕಡಿಗಳು
• 35 ಕೆಎಸ್‌ಆರ್‌ಪಿ ತುಕಡಿಗಳು
• 1 ಬಾಂಬ್‌ ನಿಷ್ಕ್ರಿಯ ಪಡ (ಬಿಡಿಡಿಎಸ್)
• 1 ಗರುಡಾ ಫೋರ್ಸ್
• 16 ವಿಶೇಷ ತಪಾಸಣೆ ತಂಡಗಳು

ಪೊಲೀಸ್ ಸರ್ಪಗಾವಲು ವ್ಯವಸ್ಥೆ ಜಾರಿಗೊಂಡಿದ್ದು, ನಿರ್ದಿಷ್ಟ ಪ್ರದೇಶಗಳಲ್ಲಿ ಪ್ರತಿಭಟನೆಗಳಿಗೆ ಸ್ಥಳ ನಿಗದಿ ಮಾಡಲಾಗಿದೆ.

ಅತಿಥಿಗಳ ವಸತಿ ಮತ್ತು ನಿರ್ವಹಣೆ:

ಮುಖ್ಯಮಂತ್ರಿ, ಉಪ ಮುಖ್ಯಮಂತ್ರಿ, ಸಚಿವರು, ಶಾಸಕರು ಸೇರಿದಂತೆ ಅಧಿವೇಶನಕ್ಕೆ ಆಗಮಿಸುವ ಎಲ್ಲಾ ಅಧಿಕಾರಿಗಳ ವಸತಿ ವ್ಯವಸ್ಥೆ ಪೂರ್ಣಗೊಂಡಿದೆ. ಜಿಲ್ಲಾಡಳಿತ ಈಗಾಗಲೇ 3,000 ಕೊಠಡಿಗಳನ್ನು ಬುಕ್ ಮಾಡಿಸಿದ್ದು, ಸಿಎಂ ಮತ್ತು ಡಿಸಿಎಂಗೆ ವಿಶೇಷ ಅತಿಥಿ ಗೃಹದಲ್ಲಿ ವಾಸ್ತವ್ಯ ವ್ಯವಸ್ಥೆ ಮಾಡಲಾಗಿದೆ. ಅಧಿವೇಶನ ಸಿಬ್ಬಂದಿಗೆ ಆಹಾರ, ಸಾರಿಗೆ, ಹಾಗೂ ಸಂವಹನ ವ್ಯವಸ್ಥೆಗಳನ್ನೂ ಸಜ್ಜುಗೊಳಿಸಲಾಗಿದೆ.

ಅಧಿವೇಶನದ ಮಹತ್ವ:

ಬೆಳಗಾವಿ ಅಧಿವೇಶನವು ವಿಶೇಷ ಪ್ರಾಮುಖ್ಯತೆಯದ್ದಾಗಿದೆ ಏಕೆಂದರೆ, ಉತ್ತರ ಕರ್ನಾಟಕದ ಅಭಿವೃದ್ಧಿ ವಿಷಯಗಳು ಇಲ್ಲಿ ಹೆಚ್ಚಿನ ಚರ್ಚೆಗೆ ಬರುತ್ತವೆ. ಗಡಿ ಸಮಸ್ಯೆ ಕುರಿತು ರಾಜಕೀಯ ತಾಪಮಾನ ಏರಲಿದೆ. ಜನರ ಸಮಸ್ಯೆಗಳ ಕುರಿತು ವಿರೋಧಪಕ್ಷಗಳು ಕಿಡಿಕಾರಲು ಸಜ್ಜಾಗಿವೆ. ಜನರ ಆಕಾಂಕ್ಷೆಗಳನ್ನು ಪೂರ್ಣಗೊಳಿಸುವ ಚರ್ಚೆಗಳು, ತೀರ್ಮಾನಗಳು ಇಲ್ಲಿಂದ ಹೊರಬರಬೇಕು ಎಂಬ ನಿರೀಕ್ಷೆ ಹೆಚ್ಚಿದೆ.

Post Views: 28